అనిల్ రావిపూడి రక్తంతో విజయ తిలకం దిద్దిన టీం... అసలేం జరిగింది?

విక్టరీ వెంకటేశ్, నందమూరి కల్యాణ్ రామ్ తొలిసారి కలిసి నటిస్తున్న భారీ మల్టీస్టారర్‌కు సంబంధించిన ప్రమోషన్లు వినూత్నంగా మొదలయ్యాయి. స్టార్ డైరెక్టర్ అనిల్ రావిపూడి దర్శకత్వంలో తెరకెక్కుతున్న ఈ సినిమా రెగ్యులర్ షూటింగ్ ప్రారంభానికి ఒక రోజు ముందు, చిత్ర యూనిట్ 'కత్తిలాంటి ఐడియా' పేరుతో ఒక సరదా వీడియోను విడుదల చేసింది. ఈ వీడియో ప్రస్తుతం సోషల్ మీడియాలో అందరి దృష్టిని ఆకర్షిస్తోంది.

షైన్ స్క్రీన్స్ నిర్మాణ సంస్థ షేర్ చేసిన ఈ ప్రమోషనల్ వీడియోలో దర్శకుడు అనిల్ రావిపూడి ఒక కత్తి పట్టుకుని, "ఎప్పుడూ ఐడియాలు నేనే ఇవ్వాలా" అంటూ సరదాగా అసహనం వ్యక్తం చేస్తారు. వెంటనే వెంకటేష్ ఆయన చేతిని కత్తితో సరదాగా కోసి, ఆ రక్తంతో విజయ తిలకం దిద్దుతారు. ఆ తర్వాత కల్యాణ్ రామ్, కీర్తి సురేశ్, కృతి శెట్టి కూడా అదే అనుసరించడంతో అనిల్ రావిపూడి ఫన్నీగా స్పందిస్తారు. రాయలసీమ నేపథ్యం అనగానే ఫ్యాక్షన్ అనుకోవద్దని, ఇది పూర్తిస్థాయి ఫ్యామిలీ ఎంటర్‌టైనర్ అని ఆయన ఈ వీడియో ద్వారా స్పష్టం చేశారు.

ఈ సినిమా జూన్ 22 నుంచి రెగ్యులర్ షూటింగ్ జరుపుకోనుంది. ఇటీవలే హైదరాబాద్‌లో పూజా కార్యక్రమాలతో ఈ ప్రాజెక్ట్ లాంఛనంగా ప్రారంభమైంది. షైన్ స్క్రీన్స్ బ్యానర్‌పై సాహు గారపాటి నిర్మిస్తుండగా, సురేష్ ప్రొడక్షన్స్, జీ స్టూడియోస్ సౌత్ సంస్థలు భాగస్వాములుగా ఉన్నాయి. కీర్తి సురేష్, కృతి శెట్టి హీరోయిన్లుగా నటిస్తుండగా, జీవీ ప్రకాష్ కుమార్ సంగీతం అందిస్తున్నారు. 2027 సంక్రాంతికి ఈ చిత్రాన్ని విడుదల చేయాలని లక్ష్యంగా పెట్టుకున్నారు. తన సినిమాలకు విభిన్నంగా ప్రచారం చేయడంలో పేరున్న అనిల్ రావిపూడి, ఈసారి కూడా అదే శైలిని కొనసాగించారు.